Ndërsa përgatitet për t’u nisur në Kupën e Botës në Katar, të pestin në karrierën e tij dhe ndoshta të fundit, Kristiano Ronaldo ka plasur “bombën” në emisionin e Piers Morgan, që është një ndër intervistat më shpërthyese të tij. CR7-ta e quan këtë moment periudhën më të vështirë e jetës së tij, si në aspektin profesional dhe në atë personal.
RANGNIK- Në rikthimin e tij, ai ka pasur tre trajnerë deri tani që e kanë drejtuar. Së pari, ishbashkëlojtari i tij Solskjaer, i cili u shkarkua vetëm disa javë pasi Ronaldo u kthye, dhe për të ai nuk ka asgjë tjetër veçse respekt. Për dy të tjerët, Ralf Rangnik dhe trajneri i tij aktual, Erik ten Hag, ai ka disa gjëra për të thënë: “Nëse nuk je as trajner, si do të bëhesh shefi i Mançester Junajtid? As që kisha dëgjuar kurrë për të”, thotë Kristiano për Rangnik, i cili nuk kishte drejtuar një ekip futbolli prej më shumë se 10 vitesh.
HUMBJA E FËMIJËS-Në shtëpi, në prill, ai dhe partnerja e tij Georgina pësuan humbjen e padurueshme të djalit të tyre gjatë lindjes, një tragjedi zemër hyese, në të cilën motra binjake e djalit mbijetoi. Në një farë mënyre, ai gjeti forcën për të vazhduar të luante, i nxitur pjesërisht nga mbështetja mahnitëse që mori nga tifozët e klubeve rivale si Liverpul, ku turma këndoi “You’ll Never Walk Alone” në minutën e shtatë, numrin që mban Kristiano në fanellë. Ai pranon: “Nuk e prisja kurrë ta shihja këtë.” Çuditërisht, ai ishte më pak i mbështetur nga klubi i tij, të cilin ai e akuzon për mungesë “empatie”, veçanërisht kur vajza e tij tremuajshe u shtrua në spital në korrik dhe ai nuk mund të kthehej në kohë për stërvitjet parasezonale, sepse donte që të qëndronte me të. Ronaldo thotë se drejtuesit e lartë në “Old Trafford”, madje dyshuan në të kur ai shpjegoi pse nuk mund të kthehej, gjë që e bëri të ndihej “i lënduar” dhe “keq”.
ZHGËNJIMI I MADH-Pak më shumë se 14 muaj më parë, Ronaldo rinënshkroi në mënyrë sensacionale për Junaitedin, në një histori rikthimi, që mahniti dhe magjepsi botën e futbollit. Ai po shkonte drejt rivalëve të mëdhenj të Junajtidit, Mançester Sitit, kur një thirrje personale nga mentori i tij i madh dhe figura e babait, Sër Aleks Ferguson, e ktheu atë atje ku filloi. “Ndoqa zemrën time”, thotë ai duke rrahur gjoksin. “Ai më tha: ‘Është e pamundur për ty të vish te Mançester Siti’, dhe unë i thashë ‘Ok shef’.”
Ronaldo u trondit nga mungesa e përmirësimeve në ambientet e stërvitjes, nga pishina dhe palestra në kuzhinë (ushqyerja dhe dieta) dhe në teknologji. “Përparimi ishte zero,” psherëtin ai. “Që kur Sër Aleks u largua, unë nuk pashë asnjë përmirësim në klub. Asgjë nuk kishte ndryshuar.”, thotë Ronaldo që flet edhe për atë çka mendon Ferguson për situatën. “Ai e di më mirë se kushdo që klubi nuk është në rrugën që meriton të jetë. Ai e di. Të gjithë e dinë. Njerëzit që nuk e shohin këtë… është sepse nuk duan të shohin, ata janë të verbër.”
KRISTI SEJATLLARI-PANORAMASPORT.AL